තමන් ඉදිරිපත් කර ඇති අන්තර්කාලීන යෝජනාවලට ආණ්ඩුව සාධනීය ප‍්‍රතිචාරයක් දක්වා ඇති නමුත් දැනට ආරම්භ කර ඇති වෘත්තීය ක‍්‍රියා මාර්ගය නැවැත්වීමට තරම් එය ප‍්‍රමාණවත් නැතැයි විශ්වවිද්‍යාල ආචාර්යවරුන්ගේ සමිති සම්මේලනය පවසනවා. එහි සභාපති ආචාර්ය නිර්මාල් රංජිත් දේවසිරි මහතා සඳහන් කළේ, වැටුප් ගැටළුවට විසඳුම් ලෙස පසුගියදා රජය වෙත ඉදිරිපත් කළ මෙම යෝජනාවලිය පිළිබඳව සාකච්ඡා වට 2 ක් පැවැත්වූ බවයි.
එස්. බී. දිසානායක සහ බැසිල් රාජපක්‍ෂ යන අමාත්‍යවරුන් සමග පැවති එම සාකච්ඡාවලදී ආචාර්යවරුන්ගේ වැටුප් ගැටළුවට විසඳුම් ලබාදිය යුතු බව ඔවුන් ද පිළිගත් බව සභාපතිවරයා කියා සිටියා.
ඉදිරි සතිය තුළදී ආචාර්යවරුන් ඉදිරිපත් කළ මෙම අන්තර්කාලීන යෝජනා සම්බන්ධයෙන් රජයේ ප‍්‍රතිචාරය තමන් වෙත ලැබෙනු ඇති බව ඔවුන් විශ්වාසය පල කරනවා. ඒ මත පදනම්ව ආචාර්යවරුන් ආරම්භ කර ඇති වෘත්තීය ක‍්‍රියා මාර්ගය සම්බන්ධයෙන් ද ලබන සතිය තුළ තීරණයක් ගැනීමට තමන් අපේක්‍ෂා කරන බව ආචාර්යවරුන්ගේ සමිති සම්මේලනයේ සභාපතිවරයා තවදුරටත් කියා සිටියා.
